Featured

First blog post

This is the post excerpt.

Advertisements

This is your very first post. Click the Edit link to modify or delete it, or start a new post. If you like, use this post to tell readers why you started this blog and what you plan to do with it.

post

​முதல்வர் பதவி குறித்து எழுச்சித்தமிழர் அவர்களின் உரை…

முதல்வர் பதவி குறித்து #மக்கள்_முதல்வர் தலைவர் எழுச்சித்தமிழர் அவர்களின் உரை…

~~~~~~~~~~~~~~~~~~~~~~~~~~

அடுத்த முதல்வர் திருமாவளவன் தான் என்று திரு.மகேஷ் அவர்கள் கூறுகின்றார், அதுதான் உலகத்தில் மிகப்பெரிய பதவி என்று மகேஷ் போன்றவர்கள் எண்ணிக்கொண்டு இருக்கிறார்கள், எனக்கு முதல்வர் பதவி சாதாரணமாக தெரிகிறது, அதை நான் வி.ஏ.ஒ பதவி போல் கருதுகிறேன், நான் முதல்வர் பதவி கிடைக்கவில்லை என்ற பொருளுக்காக சொல்லவில்லை, அந்த பதவியில் எந்த பயனும் இல்லை,ஒரு பெருமைதான், அந்த பதவியை வைத்துக்கொண்டு சட்டமன்றத்தில் என்ன சட்டத்தை நிறைவேற்ற முடியும்…?
தமிழக மீனவர்களை பாதுகாக்க உன்னால் சட்டத்தை இயற்ற முடியுமா…?
நீட் தேர்வு சட்டத்தை மத்திய அரசு திணித்ததே அதை உன்னால் தடுக்க முடியுமா…?
தமிழ்நாடு சட்டமன்றத்திற்கு உள்ளே போனால் மேசையை மட்டும் தான் தட்ட முடியும்,முதலமைச்சர் அவர்கள் முதலமைச்சர் என்ற முறையில் நாற்காலியில் அமரலாம், அது ஒரு பெரிய பதவியல்ல…!
ரஜினிகாந்த் அவர்களும்,கமலஹாசன் அவர்களும்  ஆசைப்படலாம் ஏன் என்றால் அவர்களுக்கு முன் மாதிரி எம்ஜியாரும்,ஜெயலலிதாவும்…
ஆனால் எனக்கு முன்மாதிரி புரட்சியாளர் அம்பேத்கர் அவர்களும்,தந்தை பெரியார் அவர்களும்…
எனக்கு முன்மாதிரி எம்ஜியாரும், ஜெயலலிதவும் இல்லை,ஏனென்றால் கட்சியை தொடங்கிய உடனே ஆட்சியை பிடிக்க வேண்டும், முதலமைச்சாராக வேண்டும், நாற்காலியில் அமர வேண்டும், என்று சாதிய ஆதிக்கவாதிகளுக்கு எடப்பாடி அவர்கள் எப்படியெல்லாம் பயந்து பயந்து ஆட்சி செய்து கொண்டிருக்கிறார், சாதியவாதிகளுக்கும்,மதவாதிகளுக்கும் எவ்வளவு அச்சப்பட வேண்டிய நிலை,எத்தனை பேர் கேள்விகளுக்கு பதில் சொல்ல வேண்டிய நிலை,பதில் சொல்ல வேண்டிய பொருப்பிலோ நாம் கவலைப்பட தேவையில்லை ஆனால் அது ஒன்றும் அதிகாரம் பதவி அல்ல…!
தலைமுறை,தலைமுறையாய் தொடருகின்ற அநீதிகளை எதிர்த்து போராட வேண்டும்…!
போராடுகின்ற போர்க்குணம் கொண்ட இளைஞர்களை உருவாக்க வேண்டும்…!
அந்த போர்ப்படையை வழிநடத்துகின்ற தலைவர்களை உருவாக்க வேண்டும்…!
அதுதான் திருமாவளவன் நோக்கம்…

அதுதான் திருமாவளவன் இலக்கு…
மேலும் காந்தியை உயர்த்தி பிடித்த காலம்போய் இன்று அம்பேத்கர் அவர்களை உயர்த்தி பிடிக்கின்ற காலமாக தலைகீழாக மாறி வருகிறது…
இந்த தேசத்தின் வரலாறு காந்தியா, அம்பேத்கரா என்றுதான் கடந்த நூற்றாண்டில் எழுந்தது,இந்த தேசத்தில் வரலாறு அதற்கு முன்னதாக சமூகநீதியா அல்லது  மனுநீதியா என்ற போராட்டமாகத்தான் இருந்தது…

ஆனால் இன்று விடுதலைச்சிறுத்தைகள் கட்சி சமூக நீதிக்கு ஆதரவாகவும், மனு நீதிக்கு எதிராகத்தான் இந்த இயக்கத்தை நான் கட்டமைத்துள்ளேன்…
( காஞ்சியில் நடைப்பெற்ற பொதுக்கூட்டத்தில் எழுச்சித்தமிழர் ஆற்றிய உரை)

​இந்தியாவின் பன்மைத்துவம் காக்கப்பட மாநில சுயாட்சி முக்கியம் :தொல்.திருமாவளவன்

இந்தியாவின் பன்மைத்துவம் காக்கப்பட மாநில சுயாட்சி முக்கியம் :தொல்.திருமாவளவன்

இந்திய அரசியலமைப்புச் சட்டமானது மத்தியில் ‘கூட்டாட்சி’ முறையை வலியுறுத்துகிறது. மாநில அரசுகளின் ஒன்றியமே மத்திய அரசு என அது விவரிக்கிறது. வலிமைமிக்கதாக மத்திய அரசு அமைய வேண்டும் என்பதும் அந்த வலிமையானது மாநில அரசுகளின் வலிமையிலிருந்தே அமைய வேண்டும் என்பதும் இதன் பொருளாகும். அதாவது, மாநிலங்களில் சுயாட்சி நிர்வாகத்தைக் கட்டமைப்பதன் மூலமாகவே மத்தியில் கூட்டாட்சி நிர்வாகத்தை நிறுவ முடியும். ஆக, மாநில சுயாட்சி என்பது ஏதோ மாநிலங்கள் சார்ந்த தனித்த பொருள் அல்ல!

கூட்டாட்சி என்பது ஒரு ஜனநாயக நெறிமுறை. இதன் அடிப்படையைப் புரிந்துகொள்வதன் மூலமாகவே மாநில சுயாட்சியையும் புரிந்துகொள்ள முடியும். ஒன்றுக்கும் மேற்பட்ட மாநிலங்கள், மாநில அரசுகள் என்னும் பன்மைத்துவக் கூறுகள் ஒருங்கிணைந்து, மைய அரசு என்னும் ஓர்மையை உருவாக்கும்போது, அது கூட்டாட்சி முறையைக் கொண்டதாக அமைய வேண்டும் என்கிற தேவை எழுகிறது. இதனடிப்படையில்தான் இந்திய அரசியலமைப்புச் சட்டமும் கூட்டாட்சி முறையை வலியுறுத்துகிறது.

ஆக, மாநில சுயாட்சி என்பது மாநில அரசுகளுக்கான அதிகாரங்கள் மற்றும் உரிமைகள் ஆகியவற்றைப் பற்றி மட்டுமின்றி, மத்தியில் அமைய வேண்டிய கூட்டாட்சியைப் பற்றியும் உள்ளீடாக உணர்த்துகிற ஒரு ஜனநாயகக் கருத்தியல். அதாவது, மத்தியில் வலிமைமிக்கதொரு அரசு அமைய வேண்டும் என்னும் அதேவேளையில், அது கூட்டாட்சி என்னும் கூட்டரசாக அமைய வேண்டும் என்பதே அதன் உண்மையான பொருள்.

ஆனால், இன்றைய கள நிலவரம் என்ன?

மத்தியில் வலுமிக்க அரசு அமைய வேண்டும் என்பதற்காக வலுவான அதிகாரங்கள் யாவற்றையும் ஒரே இடத்தில் குவிப்பது இன்று உச்சத்தில் இருக்கிறது. மாநில அரசுகளுக்கான அதிகாரங்களை இப்படிப் பறிப்பது, முதலில் மாநில அரசுகளை வலுக்குன்றச் செய்யும். கூடவே, மாநில அரசுகள் தமது தேவைகள் யாவற்றுக்கும் மத்திய அரசையே முழுமையாக சார்ந்திருக்க வேண்டிய நிலையை உருவாகும். மிக விரைவில் மத்திய அரசே மாநில அரசுகளுக்கான கொள்கை முடிவுகளைத் தீர்மானிப்பதாக மாற, மத்திய அரசின் முடிவுகளையும் சட்டங்களையும் நடைமுறைப்படுத்துகிற வெறும் நிர்வாக அலகுகளாக மாநில அரசுகள் மாறிவிடும்.

இப்படி மாநில அரசுகள் பலமிழக்கும்போது இந்தியா போன்ற மொழிவாரி மாநிலங்களைக் கொண்ட ஒரு நாட்டில் ஏற்படும் மிகப் பெரிய வீழ்ச்சி அந்தந்த மாநிலங்களில் வாழும் குடிமக்களின் மொழிநலன்கள், இனநலன்கள், கலாச்சார நலன்களில் ஏற்படவல்ல சேதம். அதாவது, மாநில அரசுகளின் அதிகாரங்கள் மற்றும் உரிமைகள் பறிபோகும்போது அவர்களுடைய முன்னுரிமைகளும் பறிபோகும். கூடவே அடையாளமும் பறிபோகும். காலப்போக்கில் இது மோதலுக்கு வித்திடக் கூடியது; அதுவே ஒன்றியத்தின் பலவீனத்துக்கும் வழிவகுக்கும்.

இந்திய ஒன்றியமானது ஏற்கெனவே மாநிலங்களுக்கு நிறைய அதிகாரங்களை வழங்க வேண்டிய நிலையில் இருந்துவருகிறது. நாளாக நாளாக இருக்கிற அதிகாரங்களும் பறிபோவதே இன்று பெரும் பிரச்சினையாக உருவெடுத்துவருகிறது. நம்முடைய அரசியலமைப்புச் சட்டத்தில் அதிகாரங்கள் யாவும் வகைப்படுத்தப்பட்டு அட்டவணைப்படுத்தப் பட்டுள்ளன. அதாவது, மத்திய அரசுக்குரிய அதிகாரங்கள், மாநில அரசுகளுக்குரிய அதிகாரங்கள் மற்றும் இரு தரப்பும் ஒருங்கிணைந்து கையாள வேண்டிய அதிகாரங்கள் என மூன்று வகையான அதிகாரங்கள் பட்டியல் படுத்தப்பட்டுள்ளன.

இந்த அதிகாரங்களில் மாநிலங்களின் பட்டியலிலுள்ள அதிகாரங்களை மத்தியப் பட்டியலுக்கு மாற்றுவது என்பது தொடர்ந்து நடந்துவருகிறது. அதாவது, மாநில அரசுகளுக்குரிய பல அதிகாரங்கள் இரு தரப்பாருக்கும் பொதுவான ‘ஒத்திசைவுப் பட்டியலுக்கு’ மாற்றப்பட்டன. குறிப்பாக, கல்வி, வனங்கள், அளவைமுறைகள், கொடிய விலங்குகள் மற்றும் பறவைகளின் பாதுகாப்பு, நீதி நிர்வாகம் ஆகியவை மாநிலப் பட்டியலிலிருந்து ஒத்திசைவுப் பட்டியலுக்கு மாற்றப்பட்டன. தற்போதைய நிலையில், 52 வகையான அதிகாரங்கள் ஒத்திசைவுப் பட்டியலில் இடம்பெற்றுள்ளன.

பெயர் என்னவோ, பொதுவானதாக ‘ஒத்திசைவுப் பட்டியல்’ என்று சூட்டப்பட்டிருந்தாலும், பெரும்பாலும் இவை யாவும் மத்திய அரசுக்கான அதிகாரங்களாகவே பயன்படுத்தப்பட்டுவருகின்றன. அந்த அதிகாரங்கள் தொடர்பான முடிவுகள் எவையாயினும், அவை குறித்து மாநில அரசுகளின் கருத்தை அறியவும் அவற்றின் ஒப்புதலைப் பெறவும் வேண்டுமென்கிற நடைமுறைகள் பெரும்பாலும் பெயரளவில் மட்டுமே உள்ளன. ஒருபோதும் மாநில அரசுகளின் மாற்றுக் கருத்துகளையோ எதிர்க் கருத்துகளையோ மத்திய அரசு ஒரு பொருட்டாகவே எடுத்துக்கொள்வதில்லை. மத்திய அரசின் முடிவுகளே இறுதியானவை என்பதுதான் நடைமுறையாகவுள்ளது. எடுத்துக்காட்டாக, மருத்துவக் கல்வி தொடர்பான ‘நீட்’ தேர்வு குறித்து தமிழக அரசு முன்வைத்த மாற்றுத்திட்டங்களையோ சட்ட மசோதாக்களையோ மத்திய அரசு ஏற்கவில்லை என்பதை அறிவோம். அதனால், அனிதா என்கிற மாணவி உயிரிழந்ததையும் நாடறியும்.

விரும்பும்போதெல்லாம் மாநில அரசுகளுக்கான அதிகாரங்களை வேறு பட்டியலுக்கு மாற்றிக்கொள்ளவும், தமது விருப்பம்போல் அவற்றைப் பயன்படுத்திக்கொள்ளவும் மத்திய அரசால் முடியும் என்ற சூழல் நல்லதே அல்ல. ஏனென்றால், பெரும்பாலும் மாநிலங்களுக்கான அதிகாரங்கள் மற்றும் உரிமைகள் மொழிவழி சார்ந்தே அமைந்திருக்கின்றன. மொழியுரிமைகளும் இனவுரிமைகளும் மாநில உரிமைகளில் முதன்மையானவையாக உள்ளன. இந்திய ஒன்றியத்தின் ஒற்றுமை நீடிக்க மொழிவழி தேசிய இனங்களின் உரிமைகளும் பிரதிநிதித்துவமும் பாதுகாக்கப்படுவது அவசியம் என்பதாலேயே மொழிவழியாக இந்நாட்டில் மாநிலங்கள் பிரிக்கப்பட்டன. ஆனால், இன்றைக்கு எங்கே பெரும் தாக்குதலை பாஜக அரசு செய்துகொண்டிருக்கிறது என்றால் அங்கேதான் செய்துகொண்டிருக்கிறது.

இந்தி அல்லாத பிறமொழிகளைத் தாய்மொழியாகக் கொண்ட மாநிலங்களிலெல்லாம் இந்தியைத் திணிப்பதில் முனைப்பாகவுள்ள மத்திய அரசு கொஞ்சம் கொஞ்சமாக ‘ஒரே தேசம்; ஒரே கலாச்சாரம்’ என்னும் குரலுடன் ஒற்றைக் கலாச்சாரத்தை நோக்கிச் சென்றுகொண்டிருக்கிறது. இது மாநிலங்களின் நலன்களையும் மக்களின் நிம்மதியையும் மட்டும் அல்ல; ஒன்றியத்தின் பலத்தையும் பாதிக்கக் கூடியதாகும். ஆக, மத்தியில் கூட்டாட்சி என்பது நிறைவடையவே மாநிலங்களில் சுயாட்சி தேவையாகும்!
இவர்:-

#தொல்_திருமாவளவன்,

நிறுவனர்-தலைவர்,

விடுதலைச்சிறுத்தைகள் கட்சி

ஞாநியின் மரணம் ஜனநாயகத்துக்கு பேரிழப்புவிடுதலைச் சிறுத்தைகள் இரங்கல்

ஞாநியின் மரணம் ஜனநாயகத்துக்கு பேரிழப்பு

விடுதலைச் சிறுத்தைகள் இரங்கல்

~~~~~~~~~

நாடறிந்த பத்திரிகையாளரும் அரசியல் விமர்சகருமான ஞாநி மரணமடைந்த செய்தி கேட்டு அதிர்ச்சியடைந்தோம். தமிழ்நாட்டில் ஓங்கி ஒலித்துக்கொண்டிருந்த ஜனநாயகக் குரல் இன்று அடங்கிப்போய்விட்டது. அவரது மறைவு ஜனநாயக சக்திகளுக்கு பேரிழப்பாகும். அவருக்கு விடுதலைச் சிறுத்தைகள் கட்சியின் சார்பில் வீரவணக்கத்தையும் அவரை இழந்து வாடும் கும்பத்தினருக்கு எமது ஆழ்ந்த இரங்கலையும் தெரிவித்துக் கொள்கிறோம்.
64 வயதே நிரம்பிய திரு.ஞாநி கடந்த 40 ஆண்டுகளுக்கும் மேலாக ஊடகத்துறையில் பணியாற்றி வந்தார். ஈழப்போராட்டம் உள்ளிட்ட அனைத்து விதமான ஜனநாயகப் போராட்டங்களுக்கும் அவர் ஆதரவளிக்கத் தயங்கியது இல்லை. வெடிப்புறப் பேசும் குணம் கொண்ட திரு.ஞாநி எதற்கும் அஞ்சாமல் தனது கருத்துக்களை முன்வைத்து வந்தார். மதவாதத்தை எதிர்த்துக்கொண்டு சாதிவாத்தைக் கண்டிக்காமல் ஒதுங்கிக்கொள்கிறவர்கள் நிரம்பியுள்ள தமிழ்ச் சூழலில் இரண்டையும் சமமான அறச்சீற்றத்தோடு கண்டித்துப் பேசியும் எழுதியும் வந்தவர் அவர்.
2016ஆம் ஆண்டு சட்டமன்ற தேர்தலின் போது விடுதலைச் சிறுத்தைகள் கட்சியின் வேட்பாளராக அவரை களமிறக்க விரும்பினோம். அதை மகிழ்ச்சியோடு வரவேற்ற அவர் தனது உடல்நிலையைக் காரணம் காட்டி தேர்தலில் போட்டியிட மறுத்துவிட்டார். ஆனால், மக்கள் நலக் கூட்டணிக்கு ஆதரவாகத் தொடர்ந்து கருத்துகளை வெளியிட்டு வந்தார்.
விடுதலைச் சிறுத்தைகள் கட்சி அவரது ஊடகப் பணிகளை பாராட்டி 2016 ஆம் ஆண்டு ஜூன் மாதத்தில் அவருக்கு அயோத்திதாசப் பண்டிதர் விருதளித்துக் கவுரவித்தது.  
நீரிழிவு நோயால் சிறுநீரகம் பாதிக்கப்பட்டு சிகிச்சைப் பெற்றுவந்த நிலையிலும் அவர் தனது அரசியல் கடமைகளை ஆற்றத் தவறியதில்லை. அவர் இறுதியாக முகநூலில் பதிவு செய்த கருத்துகூட அவரது வகுப்புவாத எதிர்ப்பின் வாக்குமூலமாகவே உள்ளது.
தமிழ் இதழியலுக்கும் ஜனநாயக உரிமைகளுக்கான போராட்டங்களுக்கும் புறக்கணிக்க முடியாத பங்களிப்புகளைச் செய்துள்ள திரு.ஞாநி அவர்களின் மறைவு ஈடுசெய்ய முடியாத பேரிழப்பாகும்.
இவண் 

தொல்.திருமாவளவன் 

நிறுவனர் – தலைவர்,

விசிக.

​பொங்கல் திருநாள் வாழ்த்துக்கள்!உழவுத்தொழிலைப் பாதுகாக்க உறுதியேற்போம்!தலைவர் தொல்.திருமா             ​பொங்கல் திருநாள் வாழ்த்துக்கள்!

உழவுத்தொழிலைப் பாதுகாக்க உறுதியேற்போம்!

தொல்.திருமாவளவன் அறிக்கை

~~~~~~~~~~

தமிழினத்தின் பாரம்பரியத் திருவிழாவான பொங்கல் திருவிழா நாளில் தமிழ்மக்கள் யாவருக்கும் விடுதலைச் சிறுத்தைகளின் நெஞ்சார்ந்த நல்வாழ்த்துக்களைத் தெரிவித்துக்கொள்கிறேன். 
தமிழினம் கொண்டாடும் பண்டிகைகளில் பொங்கல் விழா மட்டுமே மதம் சார்ந்தஅடையாளங்கள் ஏதுமில்லாப் பண்டிகையாகும். உழவுத் தொழிலையும் உழவுக் கருவிகளையும் உழவர் சமூகத்தையும் போற்றுகிறச் சிறப்புடையப் பொங்கல் விழாவில், உழவருக்குத் துணையாயிருக்கும் உழவு மாடுகளுக்கும் நன்றி சொல்லும் உயரிய பண்பாட்டை கொண்ட இனம்தான் தமிழினமாகும்.
‘சுழன்றும் ஏர்பின்னது உலகம்’ என்று அய்யன் திருவள்ளுவன் உழவுத்தொழிலை ஈராயிரம் ஆண்டுகளுக்கு முன்பே போற்றி மெச்சியிருப்பதை நாம் அறிவோம். ஆனால், இன்று உழவுத் தொழில் மற்றும் உழவர் சமூகத்தின் நிலை என்ன என்பதை எண்ணிப் பார்க்கிற போது நெஞ்சுப் பதறுகிறது.  விவசாயிகளும் விவசாயத் தொழிலாளர்களும் தற்கொலைச் செய்து மாளும் அவலம் உருவாகியுள்ளது. விளைநிலங்கள் யாவும் பாலை நிலங்களாக மாறிவருகின்றன. பன்னாட்டு நிறுவனங்களின் ஆக்கிரமிக்கப்புகளுக்கு உள்ளாகி வருகின்றன. மீத்தேன், ஷேல் எரிவாயுக்களை உறிஞ்சி எடுப்பதற்கானப்  பூதக் கிணறுகளாக மாறிவருகின்றன.
விவசாயக் குடும்பங்கள் இடம் பெயர்ந்தும் புலம் பெயர்ந்து  சொந்த மண்ணைவிட்டு வெளியேறுகின்றனர். 
இவற்றுக்கெல்லாம் இயற்கை பொய்த்துப் போனது மட்டுமின்றி, மத்திய மாநில அரசுகளின் தவறான பொருளாதாரக் கொள்கைகளும், விவசாயக் கொள்கைகளும் தாம் காரணங்களாகும். 
இந்நிலையில், விவசாயத்தையும் விவசாயிகளையும் பாதுகாப்பதற்கு, விவசாயக் குடும்பங்கள் மட்டுமின்றி அனைத்து தரப்பினரும் ஒருங்கிணைந்து போராடவும்

தமிழகம் உள்ளிட்ட இந்தியா முழுவதும் சூழ்ந்து வரும் சாதிய-மதவாத அரசின் தீங்குகளிலிருந்தும் மக்களை பாதுகாத்திடவும் பொங்கல் திருநாளில் அனைத்து ஜனநாயக சக்திகளும் உறுதியேற்போம்.
தமிழர் திருநாள் வெறுமெனக் கூடிக் கலையும் கொண்டாட்டத் திருநாளாக இல்லாமல் மண்ணையும் மக்களையும் குறிப்பாக உழவுத்தொழிலையும்  காப்பதற்கான சூளுரை ஏற்கும்  நாளாக கொண்டாடுவோம்.
இவண்

தொல்.திருமாவளவன்,

நிறுவனர் – தலைவர்,

விடுதலைச் சிறுத்தைகள் கட்சி.

தேசியப் பாதுகாப்புச் சட்டத்தில் எச்.ராஜாவை கைது செய்ய விடுதலைச் சிறுத்தைகள் கோரிக்கை…!!

வைரமுத்துவின் ஆண்டாள் கட்டுரை…!

எச்.ராஜாவின் அநாகரிகப் பேச்சு

தேசியப் பாதுகாப்புச் சட்டத்தில் எச்.ராஜாவை கைது செய்ய விடுதலைச் சிறுத்தைகள் கோரிக்கை…!!

~~~~~~~~~~~~~~~~~~~~~~~~~~~

கவிஞர் வைரமுத்து ஒரு நாளேட்டில் ஆண்டாளின் பாடல்கள் குறித்து கட்டுரை ஒன்றை எழுதியிருந்தார். அதில் அமெரிக்காவைச் சேர்ந்த ஆராய்ச்சியாளரின் கருத்து ஒன்றை மேற்கோள்காட்டியிருந்தார். ஆனால் அந்த கருத்தை அவர் வழிமொழிவதாக அக்கட்டுரையில் எங்கும் குறிப்பிடவில்லை. அந்த கட்டுரையை சாக்காக வைத்துக்கொண்டு ஆண்டாளை அவதூறு செய்துவிட்டார் என கவிஞர் வைரமுத்துவின் மீது எச்.ராஜா பழிபோட்டுப் அநாகரிகமாக பேசிவருகிறார். எச்.ராஜாவின் பேச்சு சாதி – மதவெறியை கொண்டதாகவும் வன்முறையைத் தூண்டும் விதத்திலும் பொது அமைதியைக் குலைக்கும் விதத்திலும் உள்ளது. இது வன்மையாகக் கண்டிக்கத்தக்கது.
ஏற்கனவே தந்தை பெரியாரை இழிவுப்படுத்தி பேசிப் பதற்றத்தை உருவாக்கினார். பின்னர் இடதுசாரி இயக்கங்களை அவதூறு செய்தார். நடிகர் விஜய் நடித்த திரைப்படத்தை வெளியிடக்கூடாது என தகராறு செய்தார். தற்போது கவிஞர் வைரமுத்துவும், அவரது கட்டுரையை வெளியிட்ட நாளேடும் வருத்தம் தெரிவித்த பின்னரும் அநாகரிகமான வார்த்தைகளில் அவதூறு செய்துள்ளார்.
என்னையும் எமது கட்சியையும் இதே போல அவர் ஆபாச வார்த்தைகளால் அர்ச்சனை செய்ததையும் வன்முறையைத் தூண்டும் விதமாகப் பேசியதையும் நாடறியும்.
எச்.ராஜா தந்தை பெரியாரை இழிவுப்படுத்தியபோது மற்றவர்கள் கண்டுகொள்ளவில்லை. இடதுசாரிகளை இழிவு செய்தபோது ஏனையோர் எதிர்ப்பு தெரிவிக்கவில்லை. விடுதலைச் சிறுத்தைகளை வம்புக்கு இழுத்தபோது ஓரிருவரைத்தவிர மற்ற கட்சிகளின் தலைவர்கள் மவுனம் காத்தனர். அரசும் வேடிக்கை பார்த்தது. அதனால் தான் மேலும் மேலும் வன்முறையைத் தூண்டும் விதத்தில் அவர் பேசிவருகிறார்.
எச்.ராஜாவின் பேச்சு எப்படியாவது தமிழ்நாட்டில் கலவரத்தை மூட்டிவிட வேண்டும் என்ற அவரது தீய நோக்கத்தை வெளிப்படுத்துகிறது.
இத்தகைய வெறுப்புப் பேச்சையும் பயங்கரவாதச் செயலாகவே கருத வேண்டும் எனவே தொடர்ந்து சமூகப் பதற்றத்தை உருவாக்கும் வகையில் பேசி வரும் எச்.ராஜாவை தேசியப் பாதுகாப்புச் சட்டத்தில் கைது செய்யுமாறு தமிழக அரசை விடுதலைச் சிறுத்தைகள் வலியுறுத்துகிறது.
இவண்

தொல்.திருமாவளவன்

நிறுவனர் – தலைவர்,

விடுதலைச் சிறுத்தைகள் கட்சி.

​எம்.ஜி.ஆர் நூற்றாண்டையொட்டி நீண்டகால சிறைவாசிகள் அனைவருக்கும் கருணைக் காட்டுங்கள்!

எம்.ஜி.ஆர் நூற்றாண்டையொட்டி 

நீண்டகால சிறைவாசிகள் அனைவருக்கும் கருணைக்  காட்டுங்கள்!

 

தமிழக அரசுக்கு விடுதலைச் சிறுத்தைகள் வேண்டுகோள்!

~~~~~~~

மறைந்த முதல்வர் எம்ஜிஆர் அவர்களின் நூற்றாண்டையொட்டித்  தமிழ்நாட்டில் பத்தாண்டுகளுக்கு மேல் சிறைகளில் உள்ள தண்டனைக்  கைதிகளை விடுவிப்பது குறித்து தமிழக அரசு பரிசீலித்து வருவதாகத் தமிழக முதலமைச்சர் கூறியிருப்பதை விடுதலைச் சிறுத்தைகள் கட்சியின் சார்பில் வரவேற்கிறோம். 
அத்துடன், குறிப்பிட்ட சில வழக்குகளைச் சார்ந்த தண்டனைக் கைதிகளை மட்டுமின்றி, நீண்டகாலமாகச் சிறையில் உள்ள அனைவரையும் விடுதலை செய்ய கருணைகாட்டுமாறு மாண்புமிகு முதல்வர் அவர்களை கேட்டுக்கொள்கிறோம். 
இந்திய அளவில் உள்ள சிறைவாசிகளின் விவரங்களை ஒவ்வொரு ஆண்டும் தேசிய குற்ற ஆவண மையம் வெளியிட்டு வருகிறது. கடந்த சில ஆண்டுகளின் புள்ளி விவரங்களைப் பார்க்கும் போது முஸ்லிம்களும் தலித்துகளும் தான் அதிக அளவில் சிறையில் அடைக்கப்பட்டிருப்பது தெரியவருகிறது.  2015ஆம் ஆண்டு புள்ளி விவரத்தின்படி தமிழ்நாட்டில் உள்ள தண்டனை சிறைவாசிகளில் 17 விழுக்காட்டினர் முஸ்லிம்கள் என்பது தெரியவந்துள்ளது. 
தமிழ்நாட்டில் நீண்டநாட்களாக சிறையில் இருப்பவர்களை புத்தாண்டிலும், தலைவர்களின் பிறந்த நாட்களின்போதும் நன்னடத்தையின் அடிப்படையில் தணடனைக் குறைப்பு செய்து விடுவித்து வந்தனர். கடந்த 2006,2007 மற்றும் 2008 ஆம் ஆண்டுகளில் தி.மு.க ஆட்சியின்போது அவ்வாறு   ஆயுள்தண்டனை சிறைவாசிகள் விடுவிக்கப்பட்டனர்.
2006 ஆம் ஆண்டு அரசாணை எண் G.O.Ms.No.873, Home Department, dated 14.09.2006 அடிப்படையில் 10 ஆண்டுகள் சிறையிலிருந்த 472 ஆயுள் சிறைவாசிகள் விடுதலை செய்யப்பட்டனர். 2007 ஆம் ஆண்டு பிறப்பிக்கப்பட்ட அரசாணை எண் G.O .Ms.No.1326, Home Department, dated 12.9.2007  அடிப்படையில் 5 பெண் கைதிகள் உட்பட 190 ஆயுள் சிறைவாசிகள் விடுதலை செய்யப்பட்டனர். 2008 ஆம் ஆண்டு பிறப்பிக்கப்பட்ட அரசாணை எண் G.O.Ms.No.1155, Home Department, dated 11.09.2008  அடிப்படையில் 1406 ஆயுள் சிறைவாசிகள் விடுதலைசெய்யப்பட்டனர்.
2011 இல் ஆட்சி மாற்றம் நடைபெற்று அதிமுக அரசு பதவியேற்றபின் தண்டனைக் குறைப்பு செய்து ஆயுள் சிறைவாசிகள் எவரும் விடுதலை செய்யப்படவில்லை. தற்போது எம்.ஜி.ஆர் நூற்றாண்டை முன்னிட்டு தமிழக அரசு கைதிகளை விடுவிக்க முன்வந்திருப்பது பாராட்டுக்குரியதாகும். ஒரு அரசின் பெருமை சட்டத்தைப் பயன்படுத்தி தண்டிப்பதில் மட்டும் இல்லை, அது கருணையை வெளிப்படுத்துவதிலும் அடங்கியுள்ளது. 
எனவே, 25 ஆண்டுகளுக்கும் மேலாக சிறையில் அடைக்கப்பட்டுள்ள பேரறிவாளன், நளினி உள்ளிட்ட ஏழு பேரையும் இதர வழக்கில் உள்ள இஸ்லாமியர்களையும் இத்தருணத்தில் விடுதலைச் செய்ய பரிவுக்காட்டுமாறு மாண்புமிகு முதல்வர் அவர்களை விடுதலைச் சிறுத்தைகள் கட்சியின் சார்பில் கேட்டுக்கொள்கிறோம். இது எம்.ஜி.ஆர் அவர்களுக்கு மேலும் பெருமை சேர்ப்பதாக அமையும் என தமிழக அரசுக்கு விடுதலைச் சிறுத்தைகள் கட்சி சுட்டிக்காட்ட விரும்புகிறது. 
இவண் 

தொல்.திருமாவளவன். 

நிறுவனர் – தலைவர், 

விசிக.